Gjeneva punëson staf të përkohshëm për të shmangur mbylljen e çerdheve komunale

Çerdhet komunale në Gjenevë po përballen me mungesë të theksuar stafi dhe po detyrohen të angazhojnë punonjës të përkohshëm për të mbuluar mungesat, raportoi Tribune de Genève. Kjo masë synon të evitojë mbylljen e çerdheve, sidomos tani që sëmundjet sezonale pritet të rrisin mungesat e punonjësve.

Megjithëse kantoni kërkon një grup zëvendësuesish, ai shpesh nuk mjafton. Për këtë arsye, qyteti ka nisur bashkëpunimin me një agjenci private të specializuar, e cila ofron staf për zëvendësime urgjente dhe afatshkurtra. Vetëm në vitin 2024, 47 vende pune me normë të plotë u mbuluan nga kjo kompani. Pagat janë të ngjashme me ato të çerdheve të subvencionuara, por më të ulëta se ato të institucioneve komunale.

Vendimi ka ngjallur kritika nga disa përfaqësues politikë, të cilët e konsiderojnë këtë si një zgjidhje të përkohshme dhe të paqëndrueshme, transmeton albinfo.ch

Megjithatë, Christina Kitsos, magistratja përgjegjëse për kohezionin social, mbetet e bindur për vazhdimin e politikës së saj për komunizimin e çerdheve. Ajo e pranon se punësimi i stafit të përkohshëm është i domosdoshëm, duke theksuar se është gjithnjë e më e vështirë të gjenden kandidatë për kontrata afatshkurtra. Sipas saj, profesioni duhet bërë më tërheqës për të zgjidhur mungesën e stafit në afatgjatë.