Osmani në Cyrih: Diaspora në Zvicër i jep jehonë mesazhit ‘rugovizmi jeton’

Në një tubim me bashkatdhetarët në Cyrih të Zvicrës, kandidatja e LDK-së për presidente, Vjosa Osmani, së bashku me kryetarin e partisë Lumir Abdixhiku, janë pritur me duartrokitje nga mërgimtarët e mbledhur në tubimin e LDK-së.

Osmani ka ndarë foto nga kjo ngjarje dhe ka shprehur mirënjohje për diasporën, duke e cilësuar atë si një mbështetje të fortë të vizionit të frymës rugoviste.

Ajo ka theksuar se historia do ta mbajë mend këtë frymë, duke përsëritur mesazhin se “rugovizmi jeton dhe fiton”, ndërsa ka falënderuar mërgimtarët për përkrahjen, duke i quajtur një “kështjellë të pathyeshme” të këtij vizioni.

Ndërsa kryetari i LDK-së njëherit kandidat për kryeministër Lumir Abdixhiku theksoi se disa momente “përjetohen dhe nuk shpjegohen”, duke e përshkruar atmosferën në Cyrih si të mbushur me “energji, dashuri dhe shpresë të jashtëzakonshme” nga komuniteti shqiptar që jeton në Zvicër.

Sipas tij, ky entuziazëm përbën kujtime të veçanta që mbeten gjatë gjithë jetës, ndërsa ka falënderuar pjesëmarrësit për praninë dhe mbështetjen e tyre.

“Ju faleminderit që jeni! LDK një herë, LDK gjithëherë!”, ka shkruar ai në fund të mesazhit të tij.