Përfaqësues nga 18 komuna të Kosovës, Ministria e Punëve të Jashtme dhe Asociacioni i Komunave të Kosovës kanë përfunduar një trajnim gjashtëditor për trajnerë në fushën e angazhimit të diasporës, duke u pajisur me certifikatat përkatëse, përcjell albinfo.ch.
Lajmi është bërë i ditur nga GIZ Kosovo, përmes një postimi në Facebook, ku bëhet e ditur se trajnimi shënon përmbylljen e një programi me katër pako trajnimi, të zhvilluara gjatë dy viteve të fundit në kuadër të nismave për migracionin e orientuar drejt zhvillimit.
Përmes këtij programi, synohet që institucionet e Kosovës të kenë kapacitete më të mëdha për të bashkëpunuar me diasporën dhe për ta shndërruar potencialin e saj në një mundësi për zhvillimin e vendit.
Krahas trajnimeve, GIZ ka mbështetur edhe themelimin e Kolegjiumit për Diasporën në kuadër të Asociacionit të Komunave të Kosovës. Kjo platformë shërben për shkëmbimin e përvojave dhe njohurive ndërmjet komunave, si dhe për zhvillimin e qasjeve të përbashkëta në angazhimin e bashkatdhetarëve.
Sipas GIZ Kosovo, certifikimi i pjesëmarrësve krijon mundësi që njohuritë dhe aftësitë e fituara gjatë trajnimit të përcillen edhe te kolegët e tjerë brenda institucioneve përkatëse.
Në këtë mënyrë, institucionet vendore pritet të vazhdojnë punën për forcimin e bashkëpunimit me diasporën edhe pas përfundimit të mbështetjes së drejtpërdrejtë nga GIZ.
Aktiviteti është realizuar nga GIZ në emër të Ministrisë Federale Gjermane për Bashkëpunim Ekonomik dhe Zhvillim (BMZ)./Albinfo.ch
