Drejtuesit e institucioneve më të larta të Kosovës kanë zhvilluar një takim koordinues, ku në fokus kanë qenë zhvillimet politike në vend dhe çështjet që kërkojnë bashkërendim ndërinstitucional, transmeton albinfo.ch.
Në takim morën pjesë presidentja e Kosovës, Justina Shiroka Pula, kryetarja e Kuvendit, Albulena Haxhiu, kryeministri Albin Kurti dhe zëvendëskryeministri, njëherësh ministri i Punëve të Jashtme dhe Diasporës, Glauk Konjufca.
Sipas njoftimit të Presidencës, pjesëmarrësit kanë diskutuar situatën aktuale politike dhe zhvillimet e fundit, si dhe çështje që lidhen me funksionimin dhe koordinimin e institucioneve të Republikës së Kosovës.
Një nga temat kryesore të takimit ishte krijimi i Grupit Punues për hartimin e Strategjisë Shtetërore lidhur me procesin e Apelit ndaj ish-krerëve të Ushtrisë Çlirimtare të Kosovës (UÇK).
Takimi u zhvillua në kuadër të koordinimit ndërmjet institucioneve të larta shtetërore, ndërsa në njoftimin e Presidencës nuk janë bërë të ditura hollësi të tjera rreth përmbajtjes së strategjisë apo hapave të mëtejshëm për hartimin e saj./Albinfo.ch
