39 mijë e 500 euro dhe katër telefona, çfarë iu gjet të dyshuarit për spiunazh?

Arrestimi për spiunazh në Merdare, Policia e Kosovës gjeti 39.500 euro dhe 500 dinar në banesën e të dyshuarit

Personi i arrestuar sot në pikën kufitare në Merdare, nën dyshimin për kryerjen e veprës penale “Spiunazh”, është ndaluar për 48 orë me aktvendim të Prokurorisë Speciale, përcjell albinfo.ch. 

Pas arrestimit, hetuesit policorë nga Drejtoria për Hetimin e Krimit të Organizuar dhe Krimeve të Rënda kanë realizuar një urdhërkontroll në vendbanimin e të dyshuarit në Dragash.

Gjatë bastisjes, autoritetet kanë gjetur dhe sekuestruar 39 mijë e 500 euro para të gatshme, 500 dinarë, katër telefona celularë, si dhe dokumente të ndryshme që konsiderohen relevante për rastin.

Prokuroria Speciale ka bërë të ditur se, brenda afatit të përcaktuar ligjor, do t’i drejtohet Gjykatës Themelore në Prishtinë me kërkesë për caktimin e masës së paraburgimit ndaj të dyshuarit.

Deri në këtë fazë, autoritetet nuk kanë dhënë detaje të tjera lidhur me dyshimet konkrete për veprën penale të “Spiunazhit” apo për përmbajtjen e dokumenteve të sekuestruara.

Prokuroria Speciale, Policia e Kosovës dhe institucionet e tjera të sigurisë kanë deklaruar se do të vazhdojnë ndërmarrjen e të gjitha veprimeve të nevojshme ligjore për zbardhjen e rastit.

I dyshuari konsiderohet i pafajshëm deri në një vendim të formës së prerë nga gjykata./Albinfo.ch

---