62% e turqve të Zvicrës votuan kundër reformës së Erdoganit

Në Gjermani afër dy të tretat e turqve janë shprehur në favor të reformës kushtetutare, në Austri, 73.2%, në Belgjikë 75.1%, në Holandë 71% etj.

Keystone

Ndërkohë që autoritetet turke kanë shpallur fitoren në referendumin për ndryshimin e kushtetutës dhe në disa shtete ku ka diasporë turke është raportuar për fitore të forcave pro Erdogan, në Zvicër ka ndodhru e kundërta. Rreth 62 për qind e turqve të Zvicrës me të drejtë vote kanë votuar kundër ndryshimit të kushtetutës turke që i jep presidentit kompetenca shumë të mëdha.

Shkalla e votave kundër, atyre që janë dhënë në Ambasadën e Turqisë në Bernë madje është rreth 70%, shkruan srf.ch. Ndërsa në Konsullatën e Përgjithshmne Turke në Cyrih, kundër kanë votuar 64% të votuesve, transmeton albinfo.ch. Mirëpo, përqindjen e ka ndryshuar votimi në Konsullatën e Turqisë në Gjenevë, ku 55% kanë votuar në favor të ndryshimit.

Ndryshe nga turqit e Zvicrës, bashkatdhetarët e tyre në vendet tjera evropiane kanë votuar bindshëm pro reformës së kërkuar nga Erdogani. Kështu, në Gjermani afër dy të tretat e turqve janë shprehur në favor të reformës kushtetutare, në Austri, 73.2%, në Belgjikë 75.1%, në Holandë 71% etj.

Votimi i turqve «zviceranë» ndryshe nga bashaktdhetarët e tyre në shtete tjera evropiane shpjegohet veç tjerash me përbërjen e komunitetit turk në Zvicër ku jetojnë përpjestimisht më shumë shtetas turq të ikur pas puçit ushtarak të viteve `80 dhe në lidhje me konfliktin kurd, shkruan albinfo.ch. Kështu, turqit e majtë dhe kurdët (po ashtu kryesisht të majtüe) në Zvicër janë më të shumtë se në Gjermani dhe në vende tjera evropiane në përpjestim me madhësinë e komunitetit në shtetet përkatëse.