Edhe këtë vit kolona të gjata në pikat kufitare

“Kolona kur po vijmë, kolona kur po shkojmë, e pakuptueshme se si shteti ynë nuk bën një përgatitje më të mirë për të pritur mërgimtarët”, thotë një mërgimtar

Bashkatdhetarët tanë, gjatë udhëtimit të tyre për në Kosovë, edhe këtë vit po ballafaqohen me pritje të gjata në kufirin Kosovë – Serbi, në pikëkalimet kufitare Merdare dhe Dheu i Bardhë.

Për mërgimtarë të shumtë këto pritje janë bërë të përvjetshme. Sipas shumë bashkatdhetarëve, kolonat e automjeteve në hyrje – dalje të kufirit me Serbinë kanë arritur deri në 10 Kilometra, sidomos gjatë ditëve të vikendit.

“Më duket se 300 orë rrugë i kemi bërë deri sa arrita në Kosovë. Nuk e di deri kur do të vazhdohet me këtë torturë të cilën e përjetojmë çdo vit”, ka thënë për “albinfo.ch” Armend Krasniqi i cili jeton në Zvicër dhe dje ka arritur për pushime në Kosovë.

“Kolona kur po vijmë, kolona kur po shkojmë, e pakuptueshme se si shteti ynë nuk bën një përgatitje më të mirë për të pritur mërgimtarët”, thotë ai.