Ndalohet tubimi turk në favor të Erdoganit

Në manifestim ishte paralajmëruar pjesëmarrja e politikanit të AKP Hursit Yildirim, i cili do të propagandonte reformimin e kushtetutës turke, në favor të Erdoganit

Fushata që presidenti turk Erdogan për ndryshimin e kushtetutës po ashpërsohet edhe në vendet jashtë Turqisë, ku jeton emigracioni turk. Kështu, edhe në Zvicër prej disa ditësh informacionet lidhur me lejimin ose ndalimin e një fushate të tillë në territorin zviceran janë ndër kryelajmet e ditës.

Ditë më parë Kantoni i Cyrihut kishte vendosur që për shkaqe sigurie të ndalonte një tubim në kuadër të kësaj fushate ku do të fliste ministri i jashtëm turk, Cavusoglu. Ndërkohë, Berna zyrtare e ka kundërshtuar kantonin e Cyrihut, duke vlerësuar se rrezikshmëria eventuale e mbajtjes së një manifestimi nuk e arsyeton ndalimin e tij, pasi që më shumë peshon e drejta themelore e lirisë së shprehjes së mendimit.

Ndërkohë edhe Policia e Kantonit Aargau ka shpallur të ndaluar një manifestim që e kishte paralajmëruar një parti turke (UETD) në Spreitenbach. Policia ka thënë se mbajtja e këtij tubimi mund të përbëjë rrezik për sigurinë. Në manifestim ishte paralajmëruar pjesëmarrja e politikanit të AKP Hursit Yildirim, i cili do të propagandonte reformimin e kushtetutës turke, në favor të Erdoganit. Më parë Cyrihu e kishte ndaluar një manifestim tjetër ku do të merrte pjesë politikani i përmendur.