Aktron vdekjen për t`u ikur borxheve

Në telefon, duke kontaktuar kompetentët e gjendjes civile, është paraqitur me emrin e vëllait të tij

Një gjerman 47 vjeçar që jeton në Salzburg, Austri ka provuar të paraqitet si i vdekur. Ai planifikonte të shkojë në Gjermani ku do të fillonte një “jetë të re”.

Ai ka dërguar në zyrën e komunës së vendbanimit të tij një certifikatë të falsifikuar vdekjeje. Në telefon, duke kontaktuar kompetentët, është paraqitur me emrin e vëllait të tij.

Sipas medieve lokale, “i vdekuri” kishte borxhe nga 60 deri në 70 mijë euro dhe nuk dëshironte t`i kthente ato. E vetmja mundësi për ta bërë këtë i kishte mbetur shpallja i vdekur.

Por mashtrimin e kishte zbuluar punëtorja e zyrës së gjendjes civile, të cilës i kishte rënë në sy numri i madh i certifikatës nga regjistri i të vdekurve. Sipas shifrës në fjalë, në Marburgun gjerman (vendlindjen e tij) me 80.000 banorë i binte që gjatë këtij viti të kishin vdekur tashmë 600 veta… që ishte shifër e pabesueshme.

Një telefonatë e nëpunëses në Marburg kishte mjaftuar për të sqaruar punën.