Kapet banda prej 10 shqiptarësh, për tregti me kokainë

Te ata janë gjetur dy kilogramë kokainë. Po ashtu u janë konfiskuar pesë vetura luksoze

Policia e Hanoverit ka kapur gjatë vikendit që shkoi një bandë droge të përbërë prej 10 shqiptarësh, të gjithë me lidhje familjare në mes vete. Sipas policisë, banda ishte aktive prej vitesh në tregun e narkotikëve.

Shtatë nga dhjetë meshkujt, të moshës 21 deri 40 vjeçare i janë dorëzuar gjyqtarit hetues, njofton dapd.

Policia kishte kapur pesë nga dilerët gjatë kohës sa ata po rrinin në një kafe duke pritur dërgesën e kokainës. Pesë të tjerët janë arrestuar në vazhdim, në vende tjera.

Gjatë arrestimeve, një polic ka pësuar lëndime të lehta nga rezistenca që kishte ofruar njëri nga të arrestuarit.

Me rastin e bastisjeve janë gjetur dy kilogramë kokainë. Po ashtu janë konfiskuar pesë vetura luksoze që janë gjetur te të dyshuarit