Zvicër: Rënie e lehtë e leximit të gazetave

Gazeta pa pagesë, "20 Minuten” me më shumë se 1.3 milionë lexues të vlerësuar, vazhdon të jetë më e lexuara

Pas një rritjeje të shënuar në vitin 2010, gazetat  sërish kanë pësuar rënie të numrit të lexuesve. Këtë trend e tregon agjencia për hulumtimin e marketingut në medie WEMF AG pas një sondazhi që ka bërë me lexuesit zviceranë gjermanofonë.

Sondazhi, që është realizuar në muajt shtator dhe tetor 2011 tregon se rënie ka pësuar madje edhe numri i lexuesve të gazetave pa pagesë si “20 Minuten” dhe “Blic kam Abend”.

Megjithëkëtë, “20 Minuten” me më shumë se 1.3 milionë lexues të vlerësuar, vazhdon të jetë më e lexuara. Ndërsa “Blick” ka tejkaluar sërish për nga numri i lexuesve gazetën “Blic kam abend” (gazetë pa pagesë), që botohet nga e njëjta shtëpi botuese. Këto dy gazeta tash kanë vendin e dytë, respektivisht të tretë në listë.  

Gazeta e Cyrihut, “Tages Anzeiger” ia ka dalë të ruajë numrin stabil të lexuesve, 508 mijë sish dhe mbetet në vendin e katërt. Ndërsa NZZ am Sonntag (javore) ka shtuar numrin  nga 490 mijë në 496 mijë.  

Në Zvicrën frankofone numri i lexuesve është më i qëndrueshëm. Madje atje gazeta pa pagesë “20 Minutes” ka shënuar një rritje për 13 mijë lexues kështu që tash ka 474 mijë sish. Ndërsa rritje edhe më të madhe ka shënuar “24 Heures” (plus 18000 ose 241000).