Baumgartner lëshohet nga 39 mijë metra dhe shkruan historinë

Para pak minutash ai ka zbritur nga Gjithësia në Tokë shëndosh e mirë

 Pasi që javën e kaluar, për shkaqe teknike, qe detyruar të anulonte përpjekjen e tij për vendosjen e rekordit botëror të lëshimit nga lartësia, nga 36.000 metra, sportisti ekstrem austriak Felix Baumgartner e ka realizuar këtë sot.

Në fakt Baumgartner me balonën e tij me helium, më të madhen që është punuar ndonjëherë, ka mbërritur në lartësinë prej 39.000 metrash, në Gjithësi.

Veç lartësisë, ai ka vendosur rekord edhe për thyerjen e murit të zërit, gjatë fluturimit të tij drejt tokës.

Përpjekja e tij për rekord u zhvillua në New Mexiko, SHBA.

Dhe, siç njoftojnë agjencitë e lajmeve që e ndjekin nga minuta në minutë, Baumgartner tashmë e ka thyer rekordin që e mbante nga viti 1960 amerikani Joe Kittinger që kishte kërcyer nga lartësia prej 31.333 metrash.

Në rrugën drejt tokës ai ka fluturuar deri në 1200 kilometra në orë, që është shpejtësi shumë më e madhe se ajo e zërit.