Kafja ua zbukuron pamjen e botës!

Në eksperimentin e bërë, probantëve u është dhënë 200 miligramë kofeinë, që është e barabartë me tre filgjana të kafesë

Hulumtues shkencorë nga Universiteti i Bohumit, Gjermani kanë zbuluar se kafeina e përmirëson perceptimin e koncepteve pozitive në tekstet e lexuara. 66 persona me të cilët është zhvilluar ky eksperiment kanë mundur të dallojnë në ekranin e kompjuterit fjalët e duhura nga nocionet që nuk kanë kuptim. Nën ndikimin e kofeinës, ky perceptim kishte dukshëm më shumë sukses te nocionet me kuptim pozitiv si: flirt, humor ose pasuri se sa te nocionet negative ose neutrale.

Por, udhëheqësi i grupit të hulumtuesve, Lars Kuchinke ka thënë se megjithatë kjo nuk do të thotë automatikisht se konsumuesit e kafesë kanë një qëndrim më pozitiv ndaj botës që i rrethon, në krahasim me ata që nuk e konsumojnë. Po ashtu ai ka thënë se “tash për tash nuk mund të pohojmë nëse ky efekt mund të shtrihet edhe në leximin e teksteve të plota.

Në eksperimentin e bërë, probantëve u është dhënë nga një tabletë prej 200 miligramë kofeinë, që është e barabartë me tre filgjana të kafesë.