Strasburgu konfirmon dëbimin e kosovarit

Gjykata Evropiane për të Drejtat e Njeriut në Strazburg,  ka marrë vendim të enjten se autorietetet zvicerane nuk kanë shkelur të drejtat e njeriut me dëbimin e një qytetari nga Kosova, që ishte bërë problematik në Zvicër.

Kosovari pas tentimeve të pasuksesshme për t’u rikthyer në Zvicër  ishte ankuar edhe në Strazburg, në Gjykatën Evropiane për të Drejtat e Njeriut.Ai  kishte migruar në moshën shtatë vjeçare duke u bashkuar me familjen në vitin 1990 në Zvicër.

Në vitin 2003 dhe 2004, ai ishte dënuar për shkelje të rënda të rregullave të komunikacionit dhe për shkak të një rrahjeje. Në vitin 2007, kosovari në fjalë është dënuar sërish për kërcënim dhe për tentim shantazhi ndaj ish-të dashurës së tij.

Në të njëjtin vit, Departamenti i Emigracionit në Schaffhausen ka marrë vendim që 24-vjeçarin nga Kosova ta dëboj nga Zvicra dhe t’ia ndaloj kthimin për dhjetë vjet. Në vitin 2008, kosovari i deportuar kishte parashtruar  një ankesë në Gjykatën Federale të Zvicrës, por tentimi ishte i pasuksesshëm.

Gjykata për të Drejtat e Njeriut në Strasburg  ka deklaruar të enjten se Zvicra me dëbimin e kosovarit nuk ka shkelur të drejtën e tij për respektimin e jetës private dhe familjare.

Sipas gjykatës, duhet të merret parasysh fakti se ai nuk është i dënuar vetëm një herë, por 5 herë me radhë në Zvicër.

Veçanërisht e ngarkojnë kosovarin kërcënimet me vdekje që i kishte bërë ish-të dashurës së tij. Gjithashtu thuhet se personi në fjalë ishte i lidhur me vendin e tij, dhe ai tashmë  është martuar që nga viti 2007 me një grua në Kosovë.