Celina tregon pse kaloi në Swansea

Bersant Celina ka folur për aventurën e re me skuadrën uellsiane

Futbollisti shqiptar, Bersant Celina, edhe zyrtarisht është prezantuar te skuadra e re e tij, Swansea City, shkruan albinfo.ch.

Ai kaloi nga Manchester City për rreth pesë milionë euro, derisa tani do të garojë në Championship.

“Jam shumë i lumtur që jam këtu dhe mezi pres të fillojmë sezonin e ri”, është shprehur Celina.

Ai ka treguar pse iu bashkua skuadrës uellsiane. “Kur kam dëgjuar se Swansea më ka kërkuar, nuk kam pasur asnjë dyshim. E di filozofinë e klubit. Kam qenë në Manchester City për një kohë të gjatë, dhe mendoj se ishte koha e duhur për t’u larguar”, ka thënë futbollisti nga Kosova.

Faqja zyrtare e Swanseas ka treguar historinë e tij. Ai u lind në Kosovë, por për shkak të luftës emigroi në Norvegji, aty ku e nisi gjithçka.

“Isha 15-vjeçar kur jam larguar nga Norvegjia për të shkuar në Manchester City. Isha në ekipin e të rinjve dhe gjithashtu kam luajtur në Holandë, që më ka ndihmuar shumë”, theksoi tutje Celina.

“Doja diçka ndryshe, dhe tani jam i lumtur”.