Festivali i rakisë për promovimin e turizmit në Skrapar

“Skrapari në gotë”, është një festë e re në paketën e festave të bashkisë Skrapar, që vijon promovimin e turizmit në këtë zonë

Skrapari është tepër i njohur për pijen e tij tradicionale alkoolike të bërë nga rrushi, rakia, e cila është e njohur jo vetëm në Shqipëri, por dhe jashtë vendit.

Promovimi i traditës së prodhimit të rakisë i ndërthurur me gatimet tradicionale, do të mbledhë më 21 shtator banorë të qytetit të Skraparit në Festivalin e Rakisë.

“Skrapari në gotë”, është një festë e re në paketën e festave të bashkisë Skrapar, që vijon promovimin e turizmit në këtë zonë, transmeton “ATA”.

Fshatrat e njohur për prodhimin e rakisë janë: Zabërzan, Rog, Vërzhezhë dhe Muzhakë. Përveç rakisë, Skrapari është i njohur edhe për produkte të tjera, si mjalti dhe shumëllojshmëria e djathërave, përcjell albinfo.ch.

Potencialet e shumta natyrore, traditat e mikpritjes, cilësia e produkteve tipike të Skraparit kanë bërë që turizmi të mos jetë vetëm stinor, por është shndërruar në turizëm gjthëvjetor.

Relievi kodrinor i Skraparit është shumë tërheqës dhe ofron një peizazh shumë të bukur panoramik. Skrapari ka shumë shpella që janë shumë tërheqëse për turistët, si shpella e Pirogoshit, e cila është një monument natyror tepër i veçantë.

Këto pasuri natyrore të lakmueshme për turizmin, e bëjnë Skraparin një zonë me resurse të pasura për zhvillimin e turizmit të aventurës dhe atë malor.

Të cilësuara si “Koloradot” shqiptare kanionet e Osumit, në Skrapar, po tërheqin gjithnjë e më shumë turistë të aventurës në vendin tonë.

Pamjet mbresëlënëse të natyrës në këtë kanion e bëjnë atë një nga më tërheqësit në rajonin e Ballkanit.

---