Dita pa makina shënohet me shumë aktivitete në Prishtinë

Dita Ndërkombëtare pa Makina është shënuar me disa aktivitete në kryeqytet

Ministria e Mjedisit dhe Planifikimit Hapësinor, Komuna e Prishtinës, SHFMU “Shkolla e Gjelbër” dhe OJQ-të “REC”, “GAC”, e “Let’s do it Kosova”, e kanë shënuar këtë ditë me aktivitete sensibilizuese, ku u përfshin edhe bllokimi i disa rrugëve të kryeqytetit për automjete.

Kjo u mundësoi biçiklistëve lëvizje më të lehtë. Në  këtë aktivitet u kërkua që kryeqyteti të bëjë shtigje të veçanta për biçikleta.

Aktiviteti i sotëm u mbajt në kuadër të fushatës tremujore “Ta pastrojmë Kosovën”, ku drejtuesit e Ministrisë së Mjedisit premtuan se gjatë vitit 2019 do të përkrahin projekte për shtimin e hapësirave të gjelbra dhe krijimin e shtigjeve të reja për biçikleta.

Drejtoresha e shkollës fillore “Shkolla e Gjelbër”, Fahrije Retkoceri, ftoi që të gjithë të kontribuojnë dhe të investojnë për një sistem në dobi të shëndetit, siç është Shkolla e Gjelbër.

Ndotja e mjedisit, sipas Retkocerit, tashmë është një fakt i hidhur. Ndërsa, Luan Hasanaj, drejtor i “Let’s do it Kosova”, ka thënë se kjo është java më e rëndësishme për mjedisin në Kosovë.

---