Qytetarët “i vendosin vizë” komisionarit Hahn për të hyrë në Kosovë

Një grup i organizuar qytetarësh i udhëhequr nga ish-asamblisti i Komunës së Drenasit, Xhavit Drenori, kanë vendosur një mesazh për komisionerin e BE-së, Johannes Hahn, në dyert e ndërtesës së BE-së në Prishtinë.

“Mirë se erdhe në Kosovë, Hahn! Ne jemi për reciprocitet, kështu që ju duhet viza që të hyni në Kosovë. Për një vizë, ju duhen 45 dokumente të ndryshme dhe 35 euro (tarifa e vizës)”, ishte kjo porosia për komisionarin evropian që i dhanë këta qytetarë, përcjell albinfo.ch.

Aktivisti nga Drenasi, Xhavit Drenori, tha se kanë ardhur për të dhënë këtë porosi për komisionarin evropian dhe për të shprehur indinjatën ndaj BE-së për qasjen karshi qytetarëve të Kosovës, të cilët po vazhdojnë të jenë të izoluar dhe pa liberalizim të vizave.

Sipas tij, për gjendjen në Kosovë, fajtor nuk është vetëm politika vendore, por edhe vetë BE-ja, e cila e ka ndihmuar formimin e shtetit të Kosovës. Edhe Këshilli për Mbrojtjen e të Drejtave dhe Lirive të Njeriut, duke komentuar vizitën e Hahnit, e ka quajtur atë mashtrues dhe premtues ordiner, që tani po brengoset për taksën 100% për mallrat nga Serbia dhe Bosnja. KMDLNj-ja ka thënë se komisionari, në vend të kësaj, është dashur të brengosej për gati 2 milionë qytetarë të Kosovës që i ka lënë të mbyllur në një rrugë qorre, pa dalje dhe pa perspektivë.