5 futbollistë nga Kosova në Bundesligë

Milot Rashica, Meritan Shabani, Elvis Rexhebeçaj, Florent Muslija dhe Leon Dajaku po luajnë në kampionatin gjerman të futbollit

Bundesliga është një nga kampionatet më të forta në Evropë. Stadiumet në Gjermani janë të mbushura me tifozë.

Në këtë kampionat po rritet numri i futbollistëve shqiptarë. Meritan Shabani është pjesë e Bayern Munich. Ai debutoi edicionin e kaluar në skuadrën e madhe gjermane. Shabani është vetëm 19-vjeçar dhe me të ardhme të ndritur. Meritani ka lindur në Munih, derisa prindërit e tij janë nga Kosova.

Në janar të këtij viti, në Werder Bremen u transferua Milot Rashica, i ardhur nga Vitesse. Futbollisti nga Vushtrria po adaptohet në skuadrën gjermane, derisa në ndeshjen e fundit ndaj Dysseldorfit luajti nga fillimi.

Elvis Rexhebeçaj është 21-vjeçar dhe luan në Wolfsburg. I lindur në Gjonaj të Prizrenit, Elvisi po e ndërton karrierën në Gjermani me plot sukses.

Florent Muslija është një tjetër futbollisti me prejardhje nga Kosova, i cili luan në Hannover. Vetëm 20-vjeçar. Ai debutoi këtë sezon, derisa është ftuar nga grupmoshat e Gjermanisë.

Futbollisti tjetër është Leon Dajaku. Sulmuesi shqiptar debutoi për Stuttgart-in në fundjavë. Skuadra e tij pësoi 3:0 ndaj Borussia Monchenglabach.

17-vjeçari i është bashkuar skuadrës A të Stutgartit për pjesën e mbetur të sezonit.

Ai ka lindur në Waiblingen të Gjermanisë, derisa familja e tij janë nga Kosova.

---