Aksidentohet autobusi në Cyrih, një grua e vdekur dhe 44 të lënduar

(KEYSTONE/Walter Bieri)

Mediat zvicerane raportojnë se një autobus i nisur nga Gjenova e Italisë që kishte si destinacion Dyseldorfin në Gjermani është përplasur në një mur afër Cyrihut në Zvicër, përcjell albinfo.ch.

Gjithnjë sipas mediave zvicerane, në këtë aksident ka vdekur një grua dhe 44 të tjerë udhëtarët janë lënduar. Tre prej tyre raportohet se janë në gjendje të rëndë.

Aksidenti kishte ndodhur rreth orës 4:15 në autostradën A3 dhe kur arritën ekipet e shpëtimit, shumë pasagjerë ishin akoma të bllokuar brenda mjetit.

Aksidenti bëri që një nga autostradat kryesore të Zvicrës të bllokohet nga të dyja anët e qarkullimit ndërmjet Brunaut dhe Wiedikon. Autobusi i përkiste kompanisë së transportit “Flixbus”.

Shkaqet e aksidentit janë ende të panjohura.