Challandes tregon për lëndimin e Kryeziut e Berishës dhe ftesën për Hadërgjonajn

Trajneri zviceran ka folur edhe një herë për ardhjen e mundshme të Florent Hadërgjonajt

Trajneri i Kosovës, Bernard Challandes, ka folur para ndeshjes miqësore me Danimarkën.

“Kemi pasur sukses në Ligën e Kombeve dhe në miqësore, por tani luajmë ndaj ekipeve nga Liga A dhe B dhe kjo është një tjetër garë, një tjetër jetë për skuadrën tonë. Për mua është një fazë interesante, por tani fillojmë nga zero”, deklaroi trajneri zviceran.

Miqësorja ndaj Danimarkës është një test i mirë për ‘Dardanët’. “Por, tani kam tri qëllime: Së pari të testojmë dobësitë tona në mbrojtje, pasi luajmë ndaj një skuadre sulmuese me lojtarë si Erikseni, Polseni e të tjerë. Qëllimi i dytë është të shikojmë sa mund të mbajmë topin dhe të provojmë të krijojmë raste. E treta është të shënojmë gol, duke ditur se Danimarka ka një mbrojtje të fortë”, tha Challandes, përcjell albinfo.ch.

Ai foli për gjendjen e Valon Berishës. “Ai është i lënduar dhe skuadra nuk e ka lejuar t’i bashkohej Kosovës, por ne kemi të tjera mundësi. Kemi Celinën, që ka luajtur shumë mirë me Swansea-n, ka dhe mundësi të tjera. Jemi në pritje të testeve për Hekuran Kryeziun, besojmë se do të jetë gati për ndeshjen e dytë”, theksoi trajneri zviceran.

Nuk kishte si të mos fliste për Hadërgjonajn. “Është e kuptueshme se atyre iu duhet kohë që të vendosin, por ne flasim çdo ditë për gjëra të tilla, si me Florent Hadergjonajn e të tjerë. Por, ju (mediet) shkruani më shumë se ç’duhet për këtë punë dhe kjo më pengon, pasi kam probleme me lojtarin, familjen dhe agjentin”, deklaroi ndër të tjera trajneri i Kosovës.

---