Shkencëtarët zviceranë, të alarmuar nga zhdukja e insekteve

Foto: Eric Ward

Studiuesit në Akademinë Zvicerane të Shkencave janë shprehur të alarmuar për zhdukjen e insekteve në Zvicër dhe Europë, dhe kanë bërë thirrje që kjo çështje të trajtohet urgjentisht, shkruan swissinfo, përcjell albinfo.ch.

60 për qind e llojeve të insekteve që janë studiuar në Zvicër, janë në rrezik, thonë shkencëtarët. Më të rrezikuarat janë insektet në zonat bujqësore dhe mjediset ujore, sipas të dhënave nga Forumi i Biodiversitetit të kësaj akademie.

Zhdukja e insekteve zvogëlon pllenimin e bimëve dhe dëmton tokën, thonë shkencëtarët, përcjell albinfo.ch.

Rendimenti dhe cilësia e më shumë se 75 për qind të bimëve kryesore në botë varen edhe nga insektet.

Kjo rënie e numrit të insekteve ka ardhur jo vetëm si pasojë e përdorimit të madh të plehrave dhe pesticideve, por edhe për shkak se janë shkatërruar mënyrat e tyre të jetesës dhe nga ndotja.

Sipas studiuesve, zhdukja e insekteve është dokumentuar shkencërisht dhe se shkaqet janë të njohura. Për shembull, një studim afatgjatë në Gjermani solli të dhëna se biomasa në këtë vend ka rënë për 76 për qind në 30 vjetët e fundit.

Nga Forumi i Biodiversitetit thonë se përpos hulumtimeve, duhet të merren edhe masa urgjente mbi shkaqet e njohura.