Shqipëria

Skulptori shqiptar e shndërron Luganon në një muze nën qiell të hapur

Gjurmët e “çelikta” të skulptorit Helidon Xhixha mund t`i ndjekësh në një gjatësi prej rreth një kilometri dhe kudo të bëjnë përshtypje të fortë jo vetëm me bukurinë, por edhe me shkëlqimin e tyre metalik

E hënë, 15 Prill 2019 - 16:00 B.SH.

Të gjithë atyre që këto ditë ia mësyjnë Luganos, qytetit pitoresk në jug të Zvicrës, skulptori nga Shqipëria, Helidon Xhixha u ka përgatitur një surprizë. Madje befasia e këndshme të pret sapo të zbresësh në stacionin kryesor hekurudhor të qytetit: një skulpturë në formë të një sfere të çarë në mes, e punuar prej çeliku, të lëbyr sytë, shkruan albinfo.ch.

Kur shikon në bazamentin e saj, sheh emrin e bashkatdhetarit tonë: Helidon Xhixha.

Vazhdojmë më tutje. Në hapin e parë që do ta bësh pasi të kesh zbritur me “funiculare”-n (teleferikun) e këndshëm në qytet, të pret edhe një perlë tjetër, po e Helidon Xhixhës, një skulpturë abstrakte po prej çeliku.

©albinfo.ch

Dhe mrekullia vazhdon më tutje kur të kesh filluar shëtinë nëpër sheshet kryesore të qytetit dhe më tutje buzë liqenit të bukur që mban emrin e qytetit.

Janë gjithsej 19 skulptura moderne që patjetër i tërheqin syrin çdo kalimtari në këtë qytet të lakmuar nga turistët e shumtë, shkruan albinfo.ch. Disa prej tyre janë në parqet e vogla në shetitoren buzë liqenit ndërsa disa të tjera edhe brenda liqenit, ku “lundrojnë” mbi ujë.

Gjurmët e “çelikta” të Helidon Xhixhës pra mund t`i ndjekësh në një gjatësi prej rreth një kilometri dhe kudo të bëjnë përshtypje të fortë jo vetëm me bukurinë por edhe me shkëlqimin e tyre metalik.

Por çfarë paraqesin këto skulptura dhe përse janë vendosur pikërisht tash? Mediat e Luganos bëjnë të ditur se ato janë një paralajmërim për ekspozitën e madhe nën qiell të hapur “Lugano: Riflessi di luce” (Lugano: reflektimet e dritës), e cila hapet më 17 prill dhe mbyllet më 22 shtator të këtij viti.