Haziri: Qëndresa Sadriu, shembulli i gjeneratës së tretë të bashkatdhetarëve

Kryetari i  Gjilanit, Lutfi Haziri, ka pritur në takim kryetaren e Kuvendit të Komunës Glattbrug të Zurich, njëherësh deputeten kantonale të Zurich, gjilanasen Qëndresa Sadriu.

Ai ka thënë se Sadriu është shembulli më i mirë i gjeneratës së tretë të bashkatdhetarëve duke marrë rol vendimmarrës.

“Më gëzon fakti që kjo politikane e re ka arritur rezultate të jashtëzakonshme në Zvicër. Qëndresa është krenaria e Gjilanit, e Kosovës dhe e bashkatdhetarëve tanë dhe po dëshmohet që gjenerata e tretë e bashkatdhetarëve ka marrë rol udhëheqës dhe vendimmarrës jo veç në sport, por edhe në politikë”, ka thënë Haziri.

E deputetja e sapozgjedhur kantonale në Cyrih, Qëndresa Sadriu, e ka falënderuar kryetarin Haziri për pritjen dhe mbështetjen për fitoren e saj atje.

“Për mua ka qenë një arritje shumë e madhe personale, por besoj edhe për të gjithë ne si komunitet. Faleminderit për përkrahjen e madhe kryetarit Lutfi Haziri dhe bashkatdhetarëve tanë në Zvicër e Kosovë që kanë bërë shumë për këtë fitore timen”, ka deklaruar Sadriu, njofton Komuna e Gjilanit. 

Sadriu, si përfaqësuese e Partisë Socialdemokrate, në mars të këtij viti, u zgjodh deputete në Parlamentin e Kantonit më të madh të Zvicrës, në atë të Zurich, njëherësh edhe kryesuese e Kuvendit të Komunës Glattbrug.