Produktet e Kosovës promovohen në tregun amerikan

Në mesin e 2600 kompanive ndërkombëtare, edhe kompanitë e Kosovës po promovojnë produktet e tyre, përcjell albinfo.ch.

Ministria e Tregtisë dhe Industrisë, përmes Agjencisë për Investime dhe Përkrahjen e Ndërmarrjeve në Kosovë (KIESA), së bashku me kompani nga Kosova po marrin pjesë në panairin “Fancy Food Show” në New York, i cili po mbahet nga data 23 deri më 25 qershor 2019.

Përmes një njoftimi, nga MTI kanë thënë se kompanitë kosovare synojnë depërtimin e produkteve të tyre jashtë vendit, me theks të veçantë rritjen e eksportit dhe të ndikojnë në zhvillimin ekonomik të Kosovës.

“Ky panair është një mundësi e mirë për kompanitë kosovare të njihen për së afërmi me trendet e industrisë ndërkombëtare dhe të lidhin marrëveshje eksporti në të ardhmen. Shtandi i Kosovës po vizitohet nga blerës, distributorë dhe agjentë shitjesh nga shtete të ndryshme të botës, të cilët po njoftohen nga afër me produktet dhe mundësitë që ofron Kosova për të bërë biznes”, thuhet në njoftimin e MTI-së.

Të interesuarit mund të vizitojnë shtandin e Kosovës – Level 1, nr. 3525, Javits Center New York City, NY.

Foto: MTI/Fb