Vreshtarët presin 1 milion vizitorë në festën e tyre, “Fête des Vignerons”

Festën e madhe gjatë tri javëve të mbajtjes së saj pritet ta vizitojnë rreth një milionë veta

Festa e vreshtarëve ose në origjinal, “Fête des Vignerons” në Vevey (Vaud) është një aktivitet i veçantë, veç tjerash, për faktin se organizohet shumë rrallë, afërsisht një herë në 20 vjet ose një herë në një gjeneratë njerëzish dhe sërish ka njëfarë rregullsie, shkruan srf.ch.

Më 18 korrik ka filluar edicioni i sivjetmë i kësaj feste, që do të zgjasë tri javë.

Edicionet e fundit para këtij, kanë qenë në vitin 1999, 1977 dhe 1955.

Nga 18 korriku në Vevey mbretëron një atmosferë e një feste të madhe e të përditshme, transmeton albinfo.ch. Organizatorët kanë ngritur një arenë në sheshin qendror të qytetit, që ka vend për 20.000 persona.

Në këtë arenë prezantohen deri në 6000 aktorë dhe këngëtarë gjatë gjithë festës. Bëhet fjalë për programe që janë një kombinim në mes të teatrit dhe mjuziklit.

E premtja e sotme i është kushtuar Kantonit Valis. Nën moton “Valisi i vendos malet në mes të festës”, dita e Kantonit të Valisit pritet të jetë një kombinim në mes të traditës dhe modernes.

Festën e madhe gjatë tri javëve të mbajtjes së saj pritet ta vizitojnë rreth një milion veta.

Organizatorët e prezantojnë festën si një “himn dashurie të shpresës për tokën, vendin, atdheun, njerëzit dhe rrënjët e tyre”.

 

---