Majko takohet me një grup të rinjsh nga Gjermania

Ky grup po vizitojnë Shqipërinë për tu njohur me historinë dhe kulturën shqiptare në kuadër të Projektit "“Rrjetëzimi i Rinisë shqiptaro-gjermane përmes kulturave”.

Sot, ministri i Shtetit për Diasporën, Pandeli Majko, u takua me një grup të rinjsh nga Gjermania, të cilët po vizitojnë Shqipërinë për t’u njohur më tepër me historinë dhe kulturën shqiptare në kuadër të projektit “Rrjetëzimi i Rinisë shqiptaro-gjermane përmes kulturave”.

Grupi i përbërë nga të rinj shqiptarë dhe gjermanë u njoh nga afër me punën e ministrit të Shtetit për Diasporën, politikat dhe projektet e realizuara dhe ato në zhvillim, përcjell albinfo.ch.

Gjatë bashkëbisedimit ministri Majko u shpreh: “Çdo i ri në Diasporë duhet të njohë prejardhjen familjare, historinë e vendit të origjinës, në mënyrë që të ruhet identiteti kombëtar”.

Grupi i të rinjve të shoqëruar nga Konsullja e Nderit të Shqipërisë në Gjermani, znj. Anduena Stephan, kanë vizituar disa nga qytete e Shqipërisë, janë njohur me natyrën, kulturën, historinë dhe traditat shqiptare.

“Rrjetëzimi i Rinisë shqiptaro-gjermane përmes kulturave” është projekt i cili u realizua në data 11- 22 gusht në bashkëpunim me Ministrinë e Integrimit të Landit të Veriut të Vestfalisë, Shoqata “IDEAL” dhe Konsullata e Nderit të Shqipërisë në Gjermani.

---