Zvicra ashpërson masat e luftës kundër mafias italiane

Disa nga masat e veçanta tashmë janë ndërmarrë, ka thënë della Valle. Mes tjerash, Fedpol-i ka vendosur ndalimin e hyrjes në Zvicër për trembëdhjetë mafiozë të gjykuar

Afërsia me Italinë e veriut është për Zvicrën një burim rreziku nga mafia e stacionuar atje. Në këtë kuptim, Zyra Federale për Polici, Fedpol ka vendosur të ashpërsojë luftën kundër mafias, ka thënë sot për Radion e transmetuesit publik të Zvicrës SRF, shefja e Fedpol-it, Nicoletta della Valle.

Ajo ka shtuar se është duke u punuar në një plan aksioni në këtë drejtim, transmeton albinfo.ch. Disa nga masat e veçanta tashmë janë ndërmarrë, ka thënë della Valle. Mes tjerash, Fedpol-i ka vendosur ndalimin e hyrjes në Zvicër për trembëdhjetë mafiozë të gjykuar.

Nga fundi i vitit, autoritetet federale do të kenë shkëmbim të rregullt të dhënash me autoritetet kantonale lidhur me problematikën në fjalë.

Pjesëtari i Qeverisë së Kantonit Aargau, i cili njëherësh është edhe kryetar i Konferencës së Drejtorëve Kantonalë të Drejtësisë dhe Policisë, Urs Hoffmann ka përshëndetur masat e përmendura të Fedpol-it.

Ai ka theksuar se në fushë të terrorizmit, autoritetet federale dhe kantonale kanë prej kohësh bashkëpunim të ngushtë mes vete dhe se ky bashkëpubum është dëshmuar.

---