Zvicra mbyll centralin bërthamor Mühleberg

Me shkyçjen e KKW Mühleberg, prodhimi i energjisë elektrike të BKW zvogëlohet për një të katërtën ndërsa në Kantonin e Bernës, për një të dytën

Centrali bërthamor për prodhimin e energjisë elektrike Mühleberg që ndodhet në perëndim të Bernës është mbyllur përfundimisht sot, në orën 12.30, shkruan srf.ch.

Mbyllja është bërë 47 vite pas ndërtimit të tij, ghegjësisht fillimit të prodhimit të energjisë elektrike.

Me mbylljen e këtij centrali, operatori BKW (ndërmarrje ndërkombëtare për prodhimin e energjisë, me seli në Bernë) është duke bërë punë prej pionier në këtë fushë, ka thënë shefja e BKW, Suzana Thoma sot para mediave në Mühleberg.

“Punë pionieri” në këtë kontekst thuhet për shkakun se është hera e parë në Zvicër që një central bërthamor po çmontohet, transmeton albinfo.ch. Sigurisht, shikuar globalisht, ka shumë centrale të tilla që janë çmontuar ose po çmontohen dhe nga ana teknike nuk është sfidë e panjohur.

Sidoqoftë, mbyllja gjegjësisht çmontimi i centralit Mühleberg është një sfidë dhe punë prej pionieri jo vetëm për BKW por dhe për administratën dhe për autoritetet, ka thënë më tutje Thoma.

Me shkyçjen e KKW Mühleberg, prodhimi i energjisë elektrike të BKW zvogëlohet për një të katërtën ndërsa në Kantonin e Bernës, për një të dytën.

---