Referendum kundër pushimit fëmijëror të etërve

Një komitet mbipartiak i përbërë nga përfaqësues të SVP dhe të liberalëve (FDP) dëshiron kështu ta rrëzojë një vendim parlamentar

Ata që kundërshtojnë pushimin dyjavësh për etërit e fëmijëve të porsalindur, nuk kanë qëndruar duarkryq pas votimit pozitiv që parlamenti i bëri këtij pushimi, vitin e kaluar, shkruan srf.ch. Kundërshtuesit patën paralajmëruar referendum lidhur me këtë dhe, tashmë kanë grumbulluar numrin prej 55.203 nënshkrimesh për këtë qëllim.

Një komitet mbipartiak i përbërë nga përfaqësues të SVP dhe të liberalëve (FDP) dëshiron kështu ta rrëzojë vendimin e përmendur parlamentar, transmeton albinfo.ch. Sipas vendimit, baballarët kanë te drejtë të marrin dy javë pushim të paguar gjatë gjashtë muajve të parë pas lindjes së fëmijës.

Vendimi parlamentar kishte ardhur si kundër-propozim indirekt i qeverisë zvicerane ndaj një iniciative e cila kërkonte katër javë pushime për baballarët. Nismëtarët e referendumit dëshirojnë të tërheqin referendumin e tyre nëse populli pranon kundër-propozimin e përmendur.

---