Me referendum, kundër përmendjes së kombësisë së delikuentëve

Për shkak të referendumit të paralajmëruar nga të rinjtë e majtë dhe të Gjelbrit, SVP nuk po e tërheq iniciativën e saj tani për tani

Nacionaliteti i delikuentëve dhe viktimave, sipas qëndrimit të shprehur me vota të Parlamentit Kantonal të Cyrihut, duhet të përmenden në raportet e policisë. Por, të rinjtë e majtë dhe të Gjelbrit duan të mbajnë referendum kundër këtij vendimi, shkruan sda.ch.

Të hënën, Parlamenti kantonal ka miratuar në leximin e dytë, me 121 pro dhe 44 vota kundër, një kundër-propozim indirekt nga qeveria lidhur me iniciativën e SVP “Në raportet e policisë, duhet të deklarohen kombësitë”, transmeton albinfo.ch. Bazuar në këtë votim, iniciativa u rekomandua të refuzohet.

Ndërsa propozimi i këshillit qeveritar kërkon që policia të informojë publikun përveç për moshën dhe gjininë edhe për kombësinë e autorëve, të dyshuarve dhe viktimave – veçanërisht në njoftimet për media dhe konferencat për shtyp.

Iniciativa e SVP-së kërkon gjithashtu publikimin e prejardhjes së mundshme të huaj të personave që tani mund të jenë shtetas zviceranë (të natyralizuar).

Duhet të grumbullohen 4000 vota

Grupi Parlamentar i SVP-së është shprehur të hënën në parlament se ai gjithashtu mund të pranojë kundër-propozimin. Sipas SVP-së, ai përmbush 90 për qind të kërkesave të tyre, përcjell albinfo.ch. Partia ishte e përgatitur të tërhiqte iniciativën nëse kundër-propozimi do të pranohej dhe jo të luftohej.

Por pikërisht kjo, luftimi i saj, ka mundësi të ndodhë. Të Gjelbërit e Rinj kanë shpallur një referendum kundër kundër-propozimit. Juso, AL dhe të Gjelbrit urbanë duan ta mbështesin referendumin, transmeton albinfo.ch. Për të plotësuar kriterin ose kaluar pragun që kërkon zhvillimi i referendumit, ata duhet të mbledhin 4000 vota. Ky “prag” nuk duket të jetë problem për iniciuesit.

Për shkak të referendumit të shpallur, SVP nuk po e tërheq iniciativën e saj tani për tani, përcjell albinfo.ch. Nëse kërkesa për referendum i plotëson kriteret, atëherë votuesit e Kantonit të   Cyrihut do të vendosin me votën e tyre për iniciativën dhe kundër-propozimin.

---