Kosova

Sllovenia me masa të reja: Ata që vijnë nga Kosova, karantinë 14-ditore

E shtunë, 20 Qershor 2020 - 10:30 albinfo.ch

Qeveria e Republikës së Sllovenisë ka miratuar ndryshimin e Dekretit për vendosjen dhe zbatimin e masave për parandalimin e përhapjes së COVID-19 në vendkalimet kufitare nëpër pikat e kontrollit, i cili ka hyrë në fuqi më 19 qershor 2020.

Qeveria sllovene ka shtuar Kosovën së bashku me disa vende të tjera të rajonit në listën e vendeve me një situatë epidemiologjike të përkeqësuar, që do të thotë se të gjithë ata që vijnë nga Kosova nuk mund të hyjnë në Slloveni pa iu nënshtruar një karantine 14-ditore.

Ndërsa, për kalim transit nëpër Slloveni, është paraparë që territori i Sllovenisë të lëshohet brenda 12 orësh.

Tashmë është vendosur një rregull i ri për hyrjen në Slloveni, sipas të cilit, vetëm personat që paraqesin një certifikatë me rezultat negativ të COVID-19, jo më të vjetër se tri ditë, i kryer në një shtet anëtare të BE-së, do të lejohen të hyjnë në Slloveni pa kufizime. /Albinfo.ch