Kosova

Nga 1 tetori në zbatim të plotë Marrëveshja e Tregtisë së Lirë Kosovë-EFTA

Marrëveshja përfshin Zvicrën, Lihtenshtajnin, Islandën dhe Norvegjinë, ndërsa Dogana e Kosovës ka njoftuar operatorët ekonomikë për procedurat që duhet të ndiqen

E mërkurë, 30 Shtator 2026 - 19:41 albinfo.ch

Nga 1 tetori 2026 hyn në zbatim të plotë Marrëveshja e Tregtisë së Lirë ndërmjet Republikës së Kosovës dhe vendeve të EFTA-s, përkatësisht Zvicrës, Lihtenshtajnit, Islandës dhe Norvegjisë.

Dogana e Kosovës ka njoftuar operatorët ekonomikë dhe të gjitha palët e interesuara për fillimin e zbatimit të plotë të marrëveshjes, e cila krijon një kornizë të re për tregtinë ndërmjet Kosovës dhe katër vendeve anëtare të EFTA-s, transmeton albinfo.ch.

Në kuadër të zbatimit të marrëveshjes janë përcaktuar edhe procedurat që lidhen me dëshmitë e origjinës dhe deklarimin doganor të mallrave që plotësojnë kushtet për trajtim preferencial.

Kjo do të thotë se operatorët ekonomikë që importojnë mallra dhe synojnë të përfitojnë nga trajtimi preferencial i paraparë me marrëveshjen duhet t’i kushtojnë rëndësi të veçantë dokumentacionit dhe rregullave të origjinës.

Dogana me thirrje për bizneset

Dogana e Kosovës u ka bërë thirrje operatorëve ekonomikë që ndryshimet t’i kenë parasysh gjatë përgatitjes dhe deklarimit të mallrave në import.

Bizneset duhet gjithashtu të sigurohen që dëshmitë e origjinës dhe dokumentacioni përkatës të jenë në përputhje me kërkesat e Marrëveshjes së Tregtisë së Lirë dhe me rregullat në fuqi.

Zbatimi i marrëveshjes me EFTA-n synon të krijojë kushte më të favorshme për shkëmbimet tregtare ndërmjet Kosovës dhe katër vendeve anëtare, duke mundësuar trajtim preferencial për mallrat që i plotësojnë kriteret e përcaktuara.

EFTA përbëhet nga Zvicra, Lihtenshtajni, Islanda dhe Norvegjia, tregje me të cilat Kosova synon të avancojë më tej marrëdhëniet ekonomike dhe tregtare.

Me zbatimin e plotë të marrëveshjes nga 1 tetori, operatorët ekonomikë do të duhet t’u kushtojnë vëmendje të veçantë procedurave doganore dhe dokumentacionit të origjinës për të përfituar nga mundësitë që ofron marrëveshja.