Itali: Shqiptari kapet me 400 mijë euro të fshehura

Photo ilustrim

Është bërë e ditur se një shqiptar është arrestuar nga policia e Napolit në Itali, pasi iu gjetën 400 mijë euro të fshehur në sediljet e pasme të automjetit të tij të modifikuar, përcjell albinfo.ch.

Thuhet se sipas hetimeve të autoriteteve italiane, shuma e parave vinte nga trafiku i shitjes së drogës për llogari të një organizate trafikantësh.

Korrieri shqiptar po e transportonte vlerën monetare në një vend të sigurt për t’u përdorur më pas në aktivitetin kriminal e sistemin e riciklimit të parave të pista.

Gjithashtu financa e Napolit ka sekuestruar 17 kg kokainë e konfeksionuar në 15 pako e 20 kg cigare kontrabandë nga Luksemburgu të fshehura në një automjet që udhëtonte nga Holanda.

Automjeti drejtohej nga një qytetar italian nga Napoli, i cili është vënë në masë arresti. Kokaina e sekuestruar do të sillte nje përfitim tregu prej 5 milionë eurosh.

Rtv Ora ka kontaktuar me autoritetet e Finanzës se Napolit, të cilët janë shprehur se hetimet janë në zhvillim e ende nuk ka prova nëse ka lidhje mes korrierit shqiptar e kokainës së sekuestruar.