BAG: 26,050 infeksione të reja me korona dhe 10 të vdekur

BAG po ashtu ka raportuar 133 pranime të reja në spitale ndërsa mesatarja 14-ditore është 76 shtrime në ditë

Në mesditën e sotme, Zyra Federale e Shëndetit Publik ka raportuar 26,050 raste të reja që kishin rezultuar pozitive me koronavirus në 24 orët e fundit.

Kjo e vendos mesataren 7-ditore në 21,597 raste, që është 43 për qind më shumë se në javën e kaluar, transmeton albinfo.ch.

Në trendin aktual, mesatarja 7-ditore e infeksioneve të reja dyfishohet afërsisht çdo 14 ditë. Incidenca 14-ditore aktualisht është 2562.33.

BAG po ashtu ka raportuar 133 pranime të reja në spitale, ndërsa mesatarja 14-ditore është 76 shtrime në ditë. 1532 persona aktualisht po trajtohen në spitalet zvicerane për Covid-19, ose 9 për qind më shumë se në javën e kaluar.

Aktualisht janë 138 pacientë me Covid-19 në terapi intensive. Kjo është 3 për qind më pak krahasuar me javën e kaluar.

BAG raporton 10 raste të reja të vdekjes nga Covid-19 në 24 orët e fundit.

---