Çka i pret emigrantët e paligjshëm në Britani, tregon ambasadori King-Smith

Emigrantët e paligjshëm nuk mund të sigurojnë punë të ligjshme.

Britania e Madhe vazhdon ta shprehë shhqetësimin e saj për kontrabandën me njerëz nga Shqipëria. Ambasadori britanik në Tiranë, Alastair King-Smith ka biseduar për këtë çështje me Drejtorin e Përgjithshëm të Policisë së Shtetit, Gledis Nano.

Përmes një njoftimi për mediat, ambasada britanike zbardh detaje të takimit, ku theksohet se dy zyrtarët ranë dakord për të vepruar sa më shpejt në përgjigje të kriminelëve që po shfrytëzojnë të rinjtë shqiptarë që po udhëtojnë drejt Mbretërisë së Bashkuar në mënyrë të paligjshme, përcjell Albinfo.ch.

“Shprehëm vendosmërinë e përbashkët për të ndaluar fluksin e emigrantëve të paligjshëm drejt Mbretërisë së Bashkuar dhe Evropës”, citohet ambasadori në komunikatë.

Tutje theksohet se në takim u diskutua për realitetin që i pret të gjithë ata që mbërrijnë në brigjet e Mbretërisë së Bashkuar.

“Emigrantët e paligjshëm nuk mund të sigurojnë punë të ligjshme. Së shpejti do të kthehen në Shqipëri dhe nuk do të jenë në gjendje të udhëtojnë kurrë më në Mbretërinë e Bashkuar. Të gjithë ata persona dhe familjarët e tyre që mund të jenë të tunduar të udhëtojnë drejt Britanisë nuk duhet të bien pre e propagandës së krimit”, ka thënë tambasadori Alastair King-Smith./Albinfo.ch/

---