Presidenti Begaj kërkon zbardhjen e plotë të incidentit me rusët në Gramsh

Begaj ka thënë se është në komunikim me strukturat e sigurisë dhe FA të cilët i inkurajon për zbardhjen e plotë të ngjarjes dhe parandalimin e situatave që cënojnë sigurinë kombëtare.

Pas incidentit të ndodhur mbrëmë në uzinën e armëve në Gramsh ka reaguar presidenti i Shqipërisë, Bajram Begaj. Në këtë rast u lënduan dy ushtarë shqiptarë nga dy rusë dhe një ukrainas, ndërsa presidenti Begaj ka thënë se po e ndjek me vëmendje rastin.

Begaj ka shkruar në Facebook se është në komunikim me strukturat e sigurisë dhe FA, të cilët i inkurajon për zbardhjen e plotë të ngjarjes dhe parandalimin e situatave që cenojnë sigurinë kombëtare, raporton Albinfo.ch.

Presidenti u shpreh mirënjohjen edhe dy ushtarëve shqiptarë, Albi Bici dhe Ardian Xhaka.

“Ngjarjen në uzinën e Gramshit po e ndjek me shumë vëmendje. Jam në komunikim të vazhdueshëm me strukturat e sigurisë, Shtabin e Përgjithshëm të Forcave të Armatosura, strukturat e shërbimeve informative dhe ato ligjzbatuese, të cilat i inkurajoj dhe i mbështes për të vazhduar punën për zbardhjen e plotë të ngjarjes dhe parandalimin e çdo situate që cenon sigurinë kombëtare. Mirënjohje për dy efektivët e Forcave të Armatosura, të cilëve u uroj shërim të shpejtë!”, ka shkruar presidenti Begaj./Albinfo.ch

---