Pensionistët zviceranë rrezikojnë të humbasin pensionin e një muaji të tërë

Fuqia blerëse e pensioneve po bie për shkak të inflacionit, sipas Konfederatës së Sindikatave Zvicerane (SGB), përcjell albinfo.ch.

Bazuar pjesërisht në parashikimet që kërkojnë rritje të primeve të sigurimeve shëndetësore me 7.5 për qind për vitin e ardhshëm, një çift mesatar pensionist mund të humbasë midis 450 dhe 500 franga, ose 8 për qind të të ardhurave të tyre, në fuqinë blerëse.

Kjo perspektivë “është tronditëse”, tha kryeekonomisti i SGB-së, Daniel Lampart, duke kërkuar që përfitimet e pleqërisë (AHV / AVS), si dhe shtylla e dytë, të përshtaten automatikisht me inflacionin.

SGB po kërkon gjithashtu që qeveria të vendosë një pension të 13-të AHV / AVS, siç është rasti me pagat zvicerane.