UBS do të dhurojë 40 milionë franga për universitetin më të mirë zviceran

Instituti Federal Zviceran i Teknologjisë elitare në Cyrih (ETHZ) do të marrë 40 milionë CHF nga banka më e madhe e Zvicrës për të promovuar sipërmarrjen dhe për të ndërtuar infrastrukturën, transmeton albinfo.ch.

Paratë do të investohen për një periudhë 10-vjeçare, sipas një njoftimi të enjten.

“Me këtë partneritet, ne synojmë të nxisim zhvillimin afatgjatë të sipërmarrjes dhe aftësive inovative në Zvicër dhe të promovojmë gjeneratën e ardhshme të sipërmarrësve”, tha Sabine Keller-Busse, presidente e UBS Zvicër.

Gjysma e shumës do të shpenzohet për dy iniciativa: ndihma e sipërmarrësve të rinj për të ngritur biznese dhe inkurajimi i nxënësve të shkollave që të gravitojnë drejt matematikës, informatikës, shkencave natyrore dhe teknologjisë.

Gjysma tjetër e bujarisë së UBS-së do të shkojë drejt ndërtimit të një ndërtese të re në kampusin Hönggerberg të ETHZ në Cyrih. Ndërtesa e re është menduar të jetë një vend ku sipërmarrësit e rinj mund të punojnë në projekte të përbashkëta dhe të ndajnë idetë me ekspertë dhe drejtues.

“Duke ndërthurur ekspertizën tonë në mësimdhënie dhe kërkime shkencore me njohuritë ekonomike dhe aftësitë e rrjetëzimit të UBS-së, ne mund ta avancojmë Zvicrën si një vend biznesi”, tha Jowl Mesot, president i ETHZ, transmeton tutje albinfo.ch.