Nataliteti në Cyrih bie për 20 për qind brenda një viti

Në 6 muajt e parë të vitit 2021, kishin lindur rreth 2600 fëmijë ndërsa në periudhën e njëjtë të vitit 2022, janë regjistruar vetëm 2028 lindje

Në gjysmën e parë të vitit 2022, qyteti i Cyrihut ka regjistruar 20 për qind më pak lindje se në të njëjtën periudhë të një viti më parë, transmeton albinfo.ch. Kjo ulje nuk është në nivelet e zakonshme, shkruan Zyra e Statistikave, e qytetit të Cyrihut.

Sipas saj, rënia prek të gjitha grupmoshat, mandej si të huajt ashtu dhe zviceranët si dhe të gjitha rrethet urbane.

Nga viti 2016 deri në vitin 2021, në 6 muajt e parë secilën herë kanë lindur rreth 2,600 fëmijë, shkruan srf.ch. Ndërsa në periudhën e njëjtë të vitit 2022 kanë lindur vetëm 2028, transmeton albinfo.ch. Edhe pse pak më shumë gra të moshës 15 deri në 49 vjeç jetonin në qytetin e Cyrihut, dukshëm më pak fëmijë kanë lindur në qytetin e Cyrihut krahasuar me vitet e mëparshme.

Statisticienët nuk japin shpjegim konkret për rënien e natalitetit në gjysmën e parë të vitit 2022.

Që nga janari 2022, shkalla e fertilitetit – numri i të porsalindurve për grua të moshës 15 deri në 49 vjeç – ka qenë gjithashtu dukshëm më e ulët.

---