“Koko Fest” mblodhi trupa teatrale nga të gjitha trevat shqiptare

Për 8 net me radhë, nga data 3 deri më 10 shtator, u mbajt Festivali Mbarëkombëtar të të Komedisë, “Koko Fest” në Korçë.

Për 8 net me radhë, nga data 3 deri më 10 shtator u mbajt Festivali Mbarëkombëtar i Komedisë “Koko Fest” në Korçë, ku trupa teatrale nga të gjitha trevat shqiptare janë bërë pjesë e edicionit të nëntë.

Siparin e këtij festivali e hapi teatri “Aleksandër Moisiu” i Durrësit me komedinë “Të prezantoj babain”, e cila në fokus kishte tradhtinë e çifteve, përcjell Albinfo.ch.

Për artdashësit u vunë në skenë shfaqje nga 8 grupe teatrale, duke bërë bashkë artistët më të mëdhenj të skenës dhe ekranit, jo vetëm në Shqipëri, por edhe në Kosovë.

Drejtoresha e Qendrës së Artit dhe Kulturës, Zamira Kita, është shprehur se për të konkurruar në këtë festival u përzgjodhën komeditë më të bukura.

Përgjatë këtyre ditëve Korça u kthye në destinacion e preferuar jo vetëm të turistëve, por edhe të artistëve shqiptarë dhe jo vetëm.

Në një bisedë me kreun e Bashkisë, Sotiraq Filo, artistët u shprehën me shumë dashuri për Korçën dhe artin.

Pjesë e aktiviteteve të kësaj jave ka qenë edhe çelja e Festivalit Ndërkombëtar të Video Artit “Gjon Mili” në Korçë, ndaj ndalesa e radhës ishte tek një prej muzeve më unik dhe me jehonë në Shqipëri./Albinfo.ch

---