Rama fton emigrantët që, në vend të ikjes, të investojnë në Shqipëri

Foto ilustrim

Mijëra emigrantë që po dalin paligjshëm nga Shqipëria drejt Britanisë së Madhe janë ftuar nga kryeministri shqiptar, Edi Rama, që në vend se të japin para për të ikur paligjshëm, të rrijnë e të investojnë në Shqipëri.

“Mos e ndërmerrni atë rrugë, sepse do të jetë gjithmonë e më e vështirë, do të jetë gjithmonë e më e kushtueshme. U duhet të paguajnë shuma marramendëse trafikantëve. Nga ana tjetër, dëshiroj t’iu them se Shqipëria nuk ka sesi t’ju ofrojë as kushtet e Gjermanisë dhe as kushtet e Britanisë, por ofron mundësi për ata që përmes punës duan sukses. Të harxhosh 30 mijë paund për të paguar trafikantë, ndërkohë që me 20-30 mijë paund dhe me një mbështetje të qeverisë ti mund të ndërtosh një agroturizëm te shtëpia e gjyshit tënd, në Kukës, në Has dhe aty mund të bësh më shumë para se edhe në Britaninë e Madhe. Atje mund të përfundosh në ferr. Nuk kemi një parajsë për t’ia ofruar askujt, por kemi vullnetin që Shqipërinë ta bëjmë më të mirë”, tha Rama, transmeton Albinfo.ch.