Kurti: Samiti i 6 dhjetorit e kthen Tiranën në kryeqendër evropiane

Keystone (AP Photo/Visar Kryeziu)

Samiti i 6 dhjetorit, ku pritet takimi i nivelit të lartë mes liderëve të BE-së dhe të Ballkanit Perëndimor, sipas kryeministrit të Kosovës, Albin Kurti, “e kthen Tiranën në një kryeqendër evropiane”, përcjell albinfo.ch.

Këtë koment Kurti e bëri gjatë një ndalese në Bashkinë e Kukësit, ku zhvilloi një takim me kryetarin e Bashkisë, Safet Gjici.

”Ky samit e kthen Tiranën kryeqendër evropiane. Dëshiroj marrëdhënie shumë të mira mes Ballkanit Perëndimor dhe BE-së”, tha Kurti.

“Jam i gëzuar që ky samit po mbahet në një kryeqytet si Tirana. Jemi të bindur se BE-ja është e ardhmja dhe fati ynë. Mezi pres që krejt Ballkani, ne si qeveri dhe shteti i Kosovës, t’i bashkëngjiten BE-së”.

Në këtë takim ishin të pranishëm edhe ish-kryeministri Pandeli Majko, si dhe ambasadori i Shqipërisë në Kosovë, Qemal Minxhozi.

Gjatë kësaj ndalese në Kukës, Kurti vendosi një tufe me lule edhe te varri i Hasan Prishtinës, i cili prehet në varrezat e dëshmoreve të këtij qyteti.

Aktualisht kryeministri Kurti dhe drejtues të tjerë të institucioneve të Kosovës, sot ndodhen në Vlorë për të marrë pjesë në aktivitetet për nder të 28 Nëntorit.