Durrës, sekuestrohet anija me mijëra tonë naftë kontrabandë nga Rusia

Shtetasi rus, Alexey Smaznov, kapiten i cisternës, ku u gjet një sasi prej rreth 24 500 tonë naftë e kontrabanduar, është arrestuar nga policia shqiptare në portin e Durrësit.

Shtetasi rus, Alexey Smaznov, kapiten i cisternës, ku u gjet një sasi prej rreth 24 500 tonë naftë e kontrabanduar, është arrestuar nga policia shqiptare në portin e Durrësit.

Burime nga agjencia detare kanë konfirmuar për Euronews Albania se është vendosur gjithashtu nën sekuestro cisterna me flamur liberian, përcjell Albinfo.ch.

Në vendimin e siguruar shkruhet se “më datë 19 shkurt 2023, nga kontrollet e ushtruara në anije, si dhe nga kontrolli i dokumentacionit, ka rezultuar se nuk dihet origjina e kësaj nafte dhe dyshohet se është naftë me prejardhje ruse”.

Anija ishte nisur nga Azerbajxhani dhe pretendohet se më pas është ngarkuar me naftë në portin Kallamata, Greqi, nga një anije tjetër, në një sasi prej 24500 tonë naftë 10 ppm.

Në vijim të veprimeve, bazuar në dyshime të arsyeshme se kjo sasi nafte e kishte origjinën nga vendet me embargo, konkretisht Rusia dhe ishte e kontrabanduar, pasi nuk disponohej dokumentacion i rregullt, më datë 20 u bë sekuestrimi i saj dhe i dokumentacionit të lundrimit të kapitenit, si dhe bllokimi i ekuipazhit që përbëhej nga 22 shtetas, për kryerjen e veprimeve të mëtejshme procedurale.

Pas 8 ditësh të bllokuar 6000 milje larg portit, ekzekutimi i urdhrit të prokurorit u bë sot për shkak të kohës së keqe, që prej ditësh kishte përfshirë gjirin e Durrësit./Albinfo.ch

---