Lajçaku, nesër në Prishtinë, për detajet e fundit të planit evropian

Të enjten dhe të premten do të qëndrojë për vizitë në Prishtinë i dërguari i posaçëm i Bashkimit Evropian për dialogun Kosovë-Serbi, Miroslav Lajçak.

Sipas njoftimit nga Brukseli, Lajçaku vjen me qëllimin që, siç u tha, të vazhdojë diskutimet si pjesë përcjellëse e takimit të nivelit të lartë që ngjau më 27 shkurt në kryeqytetin e BE-së dhe përgatitjeve për mbajtjen e tjetrit më 18 mars në Ohër të Maqedonisë së Veriut, raporton Klan Kosova, përcjell Albinfo.ch.

Tema kyçe e bisedimeve me palë të ndryshme do të jetë aneks-plani i zbatimit të krejt pikave të propozimit evropian për ujdi që u pajtua si dokument i pandryshuar.

Nga 11 nene që ka propozimi evropian, në skenën politike e shoqërore kosovare neni më i diskutuar është ai me numër shtatë.

Aty flitet për përkushtimin e të dyja palëve në arritjen e ujdisë specifike e garancive sipas përvojave evropiane për sigurimin e një niveli të përshtatshëm të vetëmenaxhimit për komunitetin serb në Kosovë si dhe formalizimi i statusit të Kishës ortodokse serbe.

E në nenin dhjetë thuhet mes tjerash se palët konfirmojnë detyrimin e tyre për t’i zbatuar krejt ujditë e mëparshme në dialog.

Lajçaku të hënën dhe të martën e 13 dhe 14 marsit do të qëndrojë edhe në Beograd./Albinfo.ch