Shqipëria, e preferuar gjithnjë e më shumë nga turistët e huaj

Saranda - Photo- Damian Hadjiyvanov

Shqipëria po bëhet shumë e preferuar, veçmas në vitet e fundit dhe statistikat janë ato që po tregojnë se ky vend tashmë ka hyrë në agjenden e shumë turistëve të huaj, përcjell albinfo.ch.

Referuar Institutit të Statistikave, në muajin e pestë të vitit hynë 705.079 shtetas të huaj në territorin shqiptar, një rritje 16.7 për qind në raport me majin e një viti më parë.

INSTAT tregon se gjatë pesëmujorit të parë 2023, numri i shtetasve të huaj që kanë hyrë në territorin shqiptar është 2.389.899. Ky numër është rritur me 42,5%, krahasuar me të njëjtën periudhë të vitit 2022.

Ndërkohë në maj 2023 numri i shtetasve shqiptarë që kanë hyrë në territorin shqiptar është 525.086. Ky numër është rritur me 11,6%, krahasuar me maj 2022.

“Hyrjet e shtetasve shqiptarë dhe të huaj në territorin shqiptar, në muajin maj 2023 janë 1.230.165. Ky tregues rezulton me një rritje 14,5%, krahasuar me maj 2022. Daljet e shtetasve shqiptarë dhe të huaj nga territori i Shqipërisë, gjatë muajit maj 2023, janë 1.120.387, duke shënuar një rënie me 0,1%, krahasuar me të njëjtën periudhë të një viti më parë”, thuhet në publikim.