Shqipëria e treta në botë për numrin e turistëve

@pixabay

Shqipëria ka shënuar rritje të numrit të turistëve prej 56%.

Kjo ka bërë që të renditet e treta në Barometrin Botëror të Turizmit për periudhën janar-korrik 2023.

Para Shqipërisë renditen Katari dhe Arabia Saudite për të huajt që vizituan këto vende në shtatë muajt e parë të vitit, përcjell albinfo.ch.

Kryeministri i Shqipërisë, Edi Rama, u shpreh se kjo arritje është rezultat i punës së të gjithëve në sektorin e turizmit.

“Kjo arritje nuk do të ishte e mundur pa përkushtimin dhe punën e palodhur të gjithë këtyre viteve dhe veçanërisht profesionistët e industrisë sonë të turizmit. Së bashku e kemi vendosur Shqipërinë në hartë si një destinacion që duhet vizituar dhe do ta bëjmë atë çdo vit gjithnjë e më të mirë”, u shpreh ai, përcjell albinfo.ch.

Rama ftoi udhëtarët të bëjnë Shqipërinë pjesë të destinacioneve të tyre dhe të zbulojnë vendin tonë.

“Nga brigjet e diellit të rivierës shqiptare deri te bukuria historike e Gjirokastrës, ne kemi diçka për të gjithë. Për udhëtarët në mbarë botën: ejani të zbuloni perlë që është Shqipëria, pasuruar nga përpjekjet e sektorit tonë të jashtëzakonshëm të turizmit”.