Ish-ministri i Shqipërisë: Kënga “Mora Fjalë” është këngë e tmerrshme

“Këngë e tmerrshme”- ish-ministri i Shqipërisë kundër luajtjes së këngës “Mora Fjalë” në stadiumin “Air Albania”

Ish-ministri i Drejtësisë dhe juristi Ylli Manjani nga Shqipëria ka kritikuar ashpër këngën “Mora Fjalë” të Shkurte Fejzës, përcjell albinfo.ch.

Për shqiptarët kënga “Mora Fjalë” është shumë e dashur, e sidomos kur ka ndeshje futbolli, por për ish-ministrin Manjani shprehet se kjo këngë është e tmerrshme.

“Ajo është përdhosje e figurës së Adem Jasharit. Është një këngë e tmerrshme, çohu Adem, pa lidhje, s’ka lidhje, zero”, është shprehur Manjani.

“Por, ama po ta thuash këtë publikisht, do të thotë që ti ke përdhosur historinë”, ka thënë Manjani, në një intervistë me GogoCast.

Më tutje ai ka kërkuar t’i shpjegojë dikush se çfarë pune ka kënga e Adem Jasharit tek Kombëtarja e Futbollit.

“Mund të më shpjegojë dikush se çfarë pune ka kënga e Adem Jasharit tek Kombëtarja e Futbollit? Pa lidhje”, kështu ka qenë reagimi i tij.

Rikujtojmë se Shkurte Fejza e këndoi këngën mora fjalë më 12 tetor të këtij viti në stadiumin ‘Air Albania’, derisa në Arenën Kombëtare pritej të zbarkonte Çekia.

 

 

---