Shqipëria e “bllokuar” nga bora, si paraqitet gjendja?

Edi Rama, FB

Reshjet e shumta në Shqipëri kanë vazhduar që nga mbrëmja e së premtes, deri të shtunën ka krijuar vështirësi në disa akse rrugore.

Gjatë natës mes së shtunës dhe dielës ka rënë intensiteti i reshjeve të dëborës në zonën veriore, por është rritur në zonën juglindore si në Qafë Thanë-Korçë, Zëmblak-Dogana Goricë, Korçë-Ersekë, Korçë-Dogana Kapshticë, në Dardhë dhe në Voskopojë.

Aksi Qafë Thanë-Doganë është përfshirë nga erë e fortë. Temperaturat kanë qenë në ulje, duke shënuar deri në -11 °C në zonat malore.

Sipas ARRSH, Grupet e punës me mjetet borëpastruese në terren kanë bërë pastrimin e rrugëve nga dëbora dhe shpërndarjen e kripës për të evituar ngricat.

Ndërsa qarkullimi vijon pa probleme, ARRSH bën apel për drejtuesit e mjeteve që të pajisen me goma dimërore dhe zinxhirë kur të udhëtojnë për në segmentet me prezencë dëbore, të ulin shpejtësinë, të respektojnë sinjalistikën dhe udhëzimet e Policisë Rrugore.

Gjatë së shtunës pati bllokime të akseve rrugore në veri e jug të Shqipërisë, megjithatë këtë mëngjes janë liruar.