Ministrja austriake e Drejtësisë: Austria do ta mbështesë Kosovën për anëtarësim në Këshillin e Evropës

Foto FB: Austrian Embassy Pristina

Ministrja austriake e Drejtësisë, Alma Zadić, ka thënë se Austria do ta mbështesë Kosovën për anëtarësim në Këshillin e Evropës dhe në procesin e mëtutjeshëm integrues në Bashkimin Evropian.

Gjatë vizitës së saj në Kosovë, ajo është takuar më ministren e Drejtësisë së Kosovës, Albulena Haxhiu, teksa kanë nënshkruar Deklaratë të Përbashkët të Bashkëpunimit mes dy vendeve, transmeton albinfo.at.

Në konferencën për media, Haxhiu ka thënë se çdo ditë e më shumë Kosova po vazhdon të ndërtojë marrëdhënie të mira bilaterale me vende të tjera, të cilat vazhdojnë ta ndihmojë shtetndërtimin e vendit, por edhe forcimin e subjektivitetit juridik ndërkombëtar.

Sipas saj, Deklarata e Përbashkët lidhur me Fuqizimin e Sundimit të Ligjit, por edhe procesi i fillimit të negocimit të Marrëveshjes për Bashkëpunim Gjyqësor në Çështjet Penale, përveç se thellojnë marrëdhëniet ndërmjet dy vendeve, kontribuojnë edhe në fuqizimin e sundimit të ligjit.

Në anën tjetër, Zadić ka deklaruar se Austria i njeh përpjekjet dhe arritjet e Kosovës për sundimin e ligjit dhe se mbeten mbështetësit afatgjatë në fushën e sundimit të ligjit.